Tere ka Yesu Kristu Wan Wou A ver orjighjigh Pita kua mbaapostol mbagenev kpaa sha u ve er tom u Ekklesia Wou u tseghan ne ye. Se mba pine ser We a lumun yô taver Pope wase N. kua Bishop wase N. sha tom ve u eren man mlumun u ve lu tesen ne, gadia U ver ve sha u wanger tar cii. Ken Yesu Kristu Wan Wou, Tor Wase, Amen.
Tere, hanma tahav mbu mimi due her a We. Nahan, taver mba kuran tar wase u Nigeria ne man wanger ve kpaa, er vea lu henen, man eren hanma kwagh sha bem, man sha mdzehemen u tar cii yô. Ken Yesu Kristu Wan Wou, Tor Wase, Amen.
Ter, U na se iyiav mbigenev er kwaghyan, mbigenev, kpaa, er mbi lu inyaregh. U fa tom wase kua ican yase kpaa. Nahan, na se mtsera u dedoo sha ishwa i ngin (shin tsinkafa ngan), man shi kwaghfan kpaa, er se de kera vihin mtsera u mbi sha daang ga. ken Yesu Kristu Wan Wou, Tor Wase, Amen.
Ter, se mba umbur mmough u Wan Wou Yesu shin ku. Ka nahan man A hembe ku man kwaghbo ye. Nahan, na se, sha mmough Na ne, iember i mimi man shi asema a taver kpaa. Ken Yesu Kristu shon Wan Wou, Tor Wase, Amen.
Ter, se mba umbur mve u Wan Wou shin tar ne. Nahan se wuese uter mba ngise kua uprofeti kpaa, Abraham, Mose, Isaka kua Jôn u Baptisma, mba ve vande sôron Un gbenda la. Na se er se ngohol Un a asema a waghn man a mimi yô. Ken Yesu Kristu Wan Wou, Tor Wase, Amen.
Ter, se mba umbur mmar u Wan Wou Yesu her a vese. A undu shagba Na cii er se hingir u luun ônov Ou. Se mba pine man zamber We ser kohol se ken tsombor Wou. Ken Yesu Kristu shon Wan Wou, Tor Wase, Amen.
Ter, uter asev mba ngise, ve lu sôron tar sha kwaghôron u sha inja, man sha mlumun u ityô cii. Nahan na se, mba aingye ne kpaa, kwaghfan u mimi kua awashima man mhen kpaa, er se nôngo sha mzehemen u tar wase jighilaa yô. Ken Yesu Kristu Wan Wou, Tor Wase, Amen.
Ter, se mba a tom u den ayôôsu man u kôron mbaaferev. Taver se asema, er se er hanma kwagh sha inja, er mayange se kighir or u ishôô sha apera ga, man mayange se na mbabov ishô ga yô. ken Yseu Kristu Wan Wou, Tor Wase, Amen.
Ter, ka We U yange U gba umace nomsoor man kwase sha gbe tar You la ye. Man ka We U tsough iniunkwase Maria sha u maren Oryiman Wase Yesu Kristu ye. Nahan, na se mtem u dedoo her noov asev man shi wase se er se mar mbayev fefa yô. Ken Yesu Kristu shon Wan Wou, Tor Wase, Amen.
Aôndo Ter ka Wan Wou Yesu Kristu A kaa a mba Kristu er ne mba iwanger i tar ye. Nahan na se, Atica, er se lu a tom u tesen mbayev kwagh u Aôndo man shi kwagh u takada kpaa yô, sha iwasen You sha u tesen akaa a mimi sha zwa kua sha akav kpaa. Ken Yesu Kristu Wou, Tor Wase, Amen.
Tere, se Tiv, se fa er mba been iyol ve lu a kwaghfan sha akaa a ve vande ungwan man ve vanden eren kpaa yô. Nahan se mba zamber a We ser; na mba been iyol sha atsan a ve a yan kua asema ve aa kundun kpaa, kwaghfan Wou u mimi, er vea zua a ku u dedoo sha mlumun Wou yô. Ken Yesu Kristu Wan Wou, Tor Wase, Amen.
Va, Cighan Jijingi, ken asema a mbamlumun Ou; man tsar usu u dooshima Wou her a vese. Tindi Jijingi Wou sha u gban mgbe u hegh; man Wea na tar uma u he. Nahan se er msen; Aôndo, ka We U tese asema a mbamlumun sha iwanger i Cighan Jijingi ye. Na se, ken Jijingi shon ne se fa akaa a mimi, man se ember sha msuurishima Na gbem yô. Ken Yesu Kristu Tor Wase, Amen.
Aôndo, ka We U kohol akuraior cii ken nongo môm ye. U soo Wer se Tiv kpaa, se wuese We, man se civir We sha nagh kun nan, man tom u eren kpaa. Nahan, tsegha mbayev asev kpishi sha aci Wou, sha u eren We addua, man u dondon gbenda u mbahenen Ouv, sha tom u u Fada ne. Yila mbayev asev mba genev kpaa, nomsoov kua kasev, sha u pasen dooshima Wou ken atô wase ken tom u u Broda man mba Sista kpaa. Nahan, vea undu icombor ve sha u luun angbianev mba nongo wase cii, man u veren tar wase iveren sha shigh You. Amen.
Ter Aôndo, ka We yange U na uter asev tom u kahan sule ne ye. Man se, ônouv vev, mayange se gba wer sha mi ga, gadia tom u kwaghyan ngun ka ityoikyaa i hanma tom sha won cii. Nahan, na se agee a iyolouv kua asema aa taver er mayange tom u dyako wase ne ua gande se ga yô. ken Yesu Kristu Tor Wase. Amen. Ter, koso iyiav yasev ken sule dedoo er mayange ma kwagh u vihin una kera nyor heregh ga yô, gadia U nengen sha hanma kwagh cii, man U hungur kwagh môm shin tar ne ga. ken Yesu Kristu Tor Wase, Amen.
Ter, se mba umbur mtev u Yesu Wan Wou ken taaikôngo. Nahan, sha mumbur u atsan a Na yô, na se mgemishima u mimi, er ijungwen yase ia hingir i mimi yô. Ken Yesu Kristu Wan Wou, Tor Wase, Amen.
Ter, ka We U kohol akuraior kpishi shin tar wase u Nigeria ne ye. Nahan er se cii se lu tsombor môm ken dooshima u mimi. Na se kwaghfan u wasen ayol ase sha gbenda u mdzehemen u tar wase. Ken Yesu Kristu Wan Wou, Tor Wase, Amen.
Ter, hegen se mba huran ihande. Taver se ayol kua asema kpaa, er tom wase ua kure vough man se zua a kwaghyan u dedoo kpaa yô, gadia tar ka u Wou, kua shagba u u kpaa ka u Wou je. U na se tar man tindi Wou u tom kpaa. Nahan, wase se ônouv Ou er se er hanma kwagh sha inja yô. Ken Yesu Kristu Wan Wou, Tor Wase, Amen.
Ter, tom wase u teen kua u yamen akaa, ka tom u dedoo je. Mbagenev ka ve va her a vese a tom u aveegh a ve sha u zuan a inyaregh; mbagenev kpaa ve va a inyaregh sha u keren akaa a a gbe ve yô. Nahan se mba wasen ior kpishi. Kpa na se, er se er hanma kwagh sha perapera, man mayange se taver ishe yum ga, shin se yam sha apera ga yô. ken Yesu Kristu Wan Wou, Tor Wase, Amen.
Ter, na mbauangev mban N.N……………., man hanma or uange her a vese, mkpeiyol kua agee a eren tom u nan kpaa. Aluer ka sha ishima You er ve ya ican sha u paan asorabo a ve shin asorabo a angbianev vev kpaa yô, taver ve asema er vea dondo Wan Wou Yesu sha gbenda u ican man vea zua a iember Na i hemban cii yô. Ken Yesu Kristu Wan Wou, Tor Wase, Amen.
Ter, umbur mbayev Ou (shin wanye Wou) mba ve (u a) kpe kera la. kohol ve sha Ishigh You ken bem kua iwanger. Man umbur uter asev mba ngise sha ikov ikov la; mbagenev mba ve fa iti i Wan wou Yesu ga kpaa, Kohol ve ken nongo Wou u sha, ken Yesu Kristu Wan Wou, Tor Wase, Amen.
Ter, ka Yesu Kristu Wan Wou, U A hingir wanye er se nahan ye. Ka Wen, U A lu ungwa imo i ngô Na Maria, kua orkuran Na Yosev man lu zan hemen ken dooshima kua kwaghfan sha ishigh You kua ishigh ki iyolouv kpaa ye. Nahan, na se, er sea za hemen ken kwaghfan u aingye ne, man sea kuran atindi a Ou kua atindi a mbamaren asev man shi mbavesen asev kpaa yô. Ken Yesu Kristu Wan Wou, Tor Wase, Amen.
Tere, ka We U yange U na ior tahav mbu eren eev sha asema a ve ye, man ka Yesu Kristu Wan Wou U A lu eren tom u aveegh er se nahan ye. Nahan, na se kwaghfan u eren hanma kwagh sha inja vough sha iwuese You kua sha iwasen i ior kpaa. Ken Yesu Kristu Wan Wou, Tor Wase, Amen.
Cighan Joseph, se va her a we sha u pasen we akaa aa eren se. Se mba zamber a we, gadia se suur sha iwasen you. Ngise, u tese dooshima wou her Cighan Maria, ngô u Aôndo, man sha u koson Wanye Yesu kpaa. Hegen yô, nenge sha a vese, gadia se mba dyako u Yesu a ye sha awambe a Na yô. Akaa a gba se kpishi je, nahan wase se sha mpin wou. Ka we u koso tsmobor u tseghan ye. Nahan koso se, mba se nyer ken tsombor u Yesu ne. Joseph, or u dooshima u mimi, war se sha hanma icul man hanma kwaghbo kpaa. We, u ngu orwasen wase u mimi, nahan wase se sha Tartor ken ityav yasev mbi nongon a tahav mbu Satan. Ngise, kpaa, u war Wanye Yesu sha ihom i mbabov, mba ve lu keren Un a ku la; hegen yô, kura nongo u mba Katoliko sha num u mbaihômouv, man ken hanma mzeiyol wase cii kpaa. Kura hanma or wase a iwasen you i been mayange ga, sha er se dondo ikyav you yô. Wase se kpaa, er uuma asev vea kar kera, man sea kpe ku u bem, man shi sea zua a iember i tsôron sha tartor yô, Amen.
Aôndo ka We u fe ishima i hanma or, man U ongo hanma mhen u nan, man U nenge sha hanma kwagh u ken myer kpaa ye. Nahan, wanger asema ase sha mve u Cighan Jijingi, er se soo U a ishima i môm, man se wuese We sha inja yô Amen. Ter, ka her a we man orsuurrunishima A dugh ye. Nahan, Wea lumun yô, A wanger se asema man A hemen se sha gbenda u mimi cii, er Wan Wou A tende zwa a vese nahan. Amen. Ter, agee a Cighan Jijingi a lu hen a vese er Una kile asema ase sha mhôônom Nam, man Una war se sha hanma kwaghbo cii yô. Amen. Ter u hembanagee man u mhôôn, A na se iember man shi bem, uma u veren sha ikev Na man shi mgemishima u mimi kpaa. A na se gratia u Cighan Jijingi man msuurunishima Na kpaa, man A taver se er mayange se kera gban wer sha aeren a dedoo ga yô. Amen.
Psalm 130. Ka shin aiv je m yer U ye, Tere. Ter ungwa imo yam, ver ato, ungwa imo i uzamber av. Tere, aluer Wea wa aferakaa iko yô, ka an ma nan til sha Tere? Kpa We U ngu a mde u asorabo, sha er a cia U yô. M ngu veren ashe keghen Ter, Uma wan ngu kehgen ka mkaanem Nam m veren ishima m kehgen ye. Uma wam ngu veren ashe keghen Ter, hemba mbakuran mba ve veren ashe ve keghen m-av u use yô. We, Israel, ver ishima kegh Ter, gadia ka hen Ter mhôônom ma lu ye, man hen a Na mpaa ngu wuee. Ka un je Una paa Israel sha aferakaa a na cii ye. Ter, na ve mmem u tsôron; wanger ve sha iwanger i tsôron, er ve mem ken bem. Amen. Se er msen; Aôndo ka We U gbe umace cii ye, man ka We U paa se kpaa ye. De mbayev Ouv mba nomsoov man mba kasev, mba ve kpe kera la, asorabo a ve cii er vea zua a mhôônom Ou, ma ve lu veren asema sha mi gbem, sha msen wase ne yô. Ken Yesu Kristu Tor Wase, Amen.
Adua l Catholic Faith l Dioceses l Ityakerada l Katekisma l late Bishops l lohodedoo l Prayer Cards l contact-us